PASAN MAMAK VII

Gurindam "PASAN MAMAK" VII
(Niat nan Sungguah)

Mancogok pasan mamak ka tujuah
Nan mamak kirimkan dari jauah
Kok lai kaganti suluah
Panarang narangi bajalan subuah

Umpamo sabatang buluah
Baniat nak jadi pambuluah
Ma aliakan ayie ka baruah
Kok lai tasiram tanaman tumbuah

Atau kok indak pambasuah basuah
Pahilangkan nan kumuah kumuah
Kok lai janiah nan karuah karuah
Ibarat ubek ganti piruruah

Atau mungkin ka jadi palupuah
Ka tampek kamanakan basimpuah
Mandanga pituah jo pitaruah
Kok lai masuak ciek dalam sapuluah

Atau kok lai ka jadi tabuah
Mamak cubo cubo mangguguah
Manjagokan kamanakan sadang bakaruah
Jan talambek sumbayang subuah

Andaikan indak bapangaruah
Kamanakan mandanga acuah tak acuah
Indak manganai jo manyintuah
Kada di ubek tukak nan tumbuah

Umpamo manumbuak kurang caruah
Bareh saganggam atahnyo sambuah
Bukan karano alu nan layuah
Padi tu bana nan batangguah

Tapi nan mamak baniat sungguah
Walau kabara hujan jo guruah
Layie cabiak dayuang kok rapuah
Ombak gilo badai mamupuah

Patah kapak batungkek paruah
Nan sampan tatap ka mamak kayuah
Mamak cubo mambongka sauah
Santano lai tampek balabuah

Di urak tali nan basauah
Di luruihkan nan bapiyuah
Sapanjang nan bisa dan amuah
Sakadar pa ubek hati nan lintuah

Jikok di agak i sungguah sungguah
Ayah jo bundo banyak nan rusuah
Banyak mamak nan ba pangaruah
Aka panjang tapi ciluah

Nan lah barasieh nyo buek karuah
Nan tanang nyo daruah-daruah
Baa urang nak kisruah
Sanang mancaliek urang ma aduah

Lah hilang ayie di lulua pambuluah
Rumah rampak suraulah runtuah
Kayu nan rimbun lah kanai tutuah
Lah hilang tampek bataduah

Iko dek ulah kurang asuah
Salah jalan salah tampuah
Akhienyo banyak nan lumpuah
Kaki sakik tungkai malapuah

Lah bak ayam patah susuah
Basorak sapanjang labuah
Samo sajo kukuak jo languah
Lah takuik mancaliek puyuah

Hiduik kok indak bapanaruah
Nan ado hanyo duto jo kicuah
Alamat di ayie ka bapaluah
Dek ulah di sumpahi aruah…

Rang Baso ka Payokumbuah
Singgah lalu ka situjuah
Bumi taban langik nak runtuah
Salah jo bana usah di ganduah....